點解講起温書就諗起「傷感情」? 其實，有好多方法，爸媽們都可以試下，你會發現，同小朋友温書 / 要小朋友温書，其實係可以唔傷感情的。今篇暫且先講：平日、從小的心理準備。
1) 首先，「温書」是為了什麼？
温書是為了學得懂？為了攞高分？還是為了小朋友幫小朋友對自己的能力有信心？
如果爸媽自己能搞清楚這個「點解」、温書的目的、你對小朋友的期望…… 那麼整個過程你會更容易決定你想要用什麼心態、用些什麼策略去處理「小朋友温書 」、「小朋友考試成績」這件事。
當然，除了要清楚自己「想要點」之外，還有要預時間和你另一半去溝通、協調合作， 有需要的話甚至其他「持份者」（例如家中長輩）也同樣要做些溝通協調，才可以給小朋友一個清楚一致的環境和支持。
「點解大人要幫小朋友温書啫？我哋以前都係自己温㗎啦！」
這個問題，我自己曾經都面對這掙扎…。因此，爸媽們要幫自己諗清楚，自己的期望與界線在哪裏，因為同小朋友温書並不是一件易事，大人如果自己好清晰，才會有力量keep住做落去。
2) 小朋友知唔知道佢點解要温書？
由幼稚園開心上學不用温書考試，升到小一逐漸要每個星期串字默書、學筆順還有grammar… ，小朋友天真漫瀾，可能真的會「都唔知點解突然間要做多咁多嘢 ……」雖然K3時老師\可能已會和他們介紹小一會是怎樣，但 5、6歲小人兒如果能夠「知道要做，會跟住做」已係好叻豬。如你孩子問你，「點解要做咁多呢啲嘢㗎？！」爸爸媽媽你們會怎樣回答？
- 「因為呢，小朋友係要學嘢的，咁大個先可以照顧到自己…. 照顧到人哋….」
- 「因為呢，要默書要考試，係要等老師同埋你自己（同埋媽咪）知道你識咗幾多嘢，咁咪可以知道邊啲你已經識咗，咪唔使再講咁多嗰部分，可以教你其他嘅部分囉。」
- 「因為呢，呢個世界所有嘅嘢都係要學先會識嘅，咁每個人係識之前呢，都係唔識嘅 ~，咁所以唔識係好正常㗎，只要你去學去練，咁就會由原本唔識，慢慢變做識㗎喇！」
當然，如果你小朋友已經是三、四年級，他一定已知道他的學業成績是重要的（在香港的教育下，好難會有學生會被貫輸話成績唔重要吧!!）
重要的是爸媽們可以點樣幫孩子能有「自己的進步」，於是能在這制度下，無論成績如何，仍可建立到自信， 知道自己總有潛力去成長 — 只要自己肯努力。（講緊係Growth Mindset呢！）
#仔女考試 #陪温書 #唔傷感情 #心理準備 #讓孩子成功 #正向親職 #港爸媽 #親職教練 #未來親職Hk #www.futureparentinghk.com
